Schrief ie wel es verhaelen veur de aorighied en misschien zels wel in et Stellingwarfs? En hej’ daor een protte nocht an? Doe dan mit an de schriefwedstried van de Stellingwarver Schrieversronte. Schrief een biezunder verhael van 1000 woorden in et Stellingwarfs over een biezundere boom argens in de Stellingwarven en misschien wodt jow verhael wel publiceerd.
De laeste drie jaor bin d’r deur de Schrieversronte stokmennig mooie kienderboeken uutgeven. Nao de in 2022 uutkommen vertaeling van Het lammetje dat een varken is van Pim Lammers, volgde in 2023 de vertaeling van De boom met het oor van Annet Schaap. Van dit boek is in 2024 ok een Stellingwarver meziekveurstelling opvoerd. In dit jaor is ok de Stellingwarver vertaeling uutkommen van et boek dat Bibi Dumon Tak in 2021 schreef veur de Week van de Filosofie; De eik was hier, een prachtig boek over een beroemde, echt bestaonde iekeboom in de middelbaarm van een snelweg in et zuden van Nederlaand. Prachtig in et Stellingwarfs ommezet deur Christine Mulder mit de titel ieken was hier.
Bi’j oons in de Stellingwarven bin ok biezundere bomen te vienen die elk heur eigen verhael hebben. Een hiel biezundere is wel de iekeboom in Appelsche op ’e Bosbarg, et hoogste punt van Frieslaand. Of misschien kuj’ beter zeggen ìn de Bosbarg in Appelsche. Disse ieuwenoolde iekeboom zit naemelik veur een groot pat onder de grond. Een jaor of wat leden is nao boomonderzuuk bleken dat et verhael dat de ronde dee over disse boom, gien faobel was, maar echt waor. De iekeboom die bovenop ’e Bosbarg staot, is alliend nog mar et toppien van een boom die diepe in de grond zit en meer as 350 jaor oold is. Dit waore verhael van disse iekeboom moet deurverteld wodden.
Mar dit is vanzels niet de ienige boom in de Stellingwarven mit een biezunder verhael. Zo hewwe nog de iekeboom op ’e Bekhofschaans bi’j Berkoop of de meerstammige iekeboom in de Rottige Miente (langes de rooie wandelroute) en de plataan veur Huus Lindenoord in Wolvege. En misschien staot d’r argens bi’j jow op ’e buurt ok wel een boom die een prachtig verhael te vertellen het. Wi’j vraogen dan ok an alle Stellingwarver schrievers om naor et veurbield van Bibi Dumon Tak een Stellingwarver versie te vertellen van De eik was hier. Aj’ dat boek eerst lezen willen, de Schrieversronte het veur meensken die mitdoen willen an de schriefwedstried, een exemplaor beschikber. Ok te bestellen via de webstee www.stellingwarfs.nl
Aj’ de spelling van et Stellingwarfs nog niet kennen, dan gef dat niks, et gaot eerstens om et verhael, de spelling kan laeter anpast wodden. Et verhael mag niet meer as duzend woorden tellen en moet gaon over een bestaonde boom in Oost- of Weststellingwarf. Veur de winner is d’r een mooie pries en de mooiste verhaelen wodden inspreuken en op oonze webstee plaetst. Toegeliekertied kan et jongvolk van 10 tot 18 jaor in heur eigen kategorie mitdoen an disse schriefwedstried over een bezundere boom. Ok veur et beste verhael, schreven deur iene onder de achttien jaor, ligt een mooie pries klaor.
