Eupening ni’je gebouw Schrieversronte
De Stellingwarver Schrieversronte het zaoterdag 19 oktober et ni’je gebouw an de Willinge Prinsstraote 20 in Berkoop feestelik eupend.
De beide kultuurwethoolders Jelke Nijboer van Ooststellingwarf en Roelof Theun Hoen van Weststellingwarf eupenden et ni’je gebouw deur een papieren ofscheiding vot te trekken. Daornao weren d’r toespraoken van de beide wethoolders, Schrieversronte-veurzitter Klaas van Weperen en direkteur Abel Darwinkel. De middag wodde an mekeer praot deur Jan-Berend van Elp.
Nao de officiële eupening kwamen d’r een protte meensken naor et eupen huus. De bezukers geneuten van een mooie middag mit veurdrachten, meziek en een rondleiding deur et ni’je gebouw. Elkeniene was enthousiast over et ni’je onderkommen waor de Stellingwarver Schrieversronte de toekomst mit vertrouwen tegemoet zien kan. De Schrieversronte is alle weken eupen van maendag tot en mit donderdag.
Aj’ as veriening ok es een rondleiding willen deur et ni’je gebouw mit anslutend een lezing over et Stellingwarfs en et wark van de Schrieversronte, kuj’ et beste even kontakt opnemen mit de Schrieversronte: 0516-451108, of info@stellingwarfs.nl
