De heer Jeroen Zandberg warkt an et Wetenschoppelik Buro van NSC. Hi’j is specialist op et terrein van de pesisie van streektaelen, mit naeme de Oost- en Noord-Friese in Noordwest-Duutslaand. Hi’j prissenteert 15 april zien ni’jste rappot. Et is richt op Oost- en West-Stellingwarf, mit naeme op de bestuurlike, de maotschoppelike en juridische pesisie van et Stellingwarfs in de meertaelige kontext van beide gemienten.
In een kotte veurpublikaosie gaf de heer Zandberg al an dat de pesisie van et Stellingwarfs drie inzichten onderstreept:
- Erkenning zonder instermenten is niet genoeg. Deel II-erkenning onder et Europees haandvest veur regionaole taelen of taelen van minderheden geft wel symboliek, mar gien strukturele bescharming.
- ‘Uniform beleid’ kan regionaole diversiteit onder drok zetten. Maotwark is neudig, al hielemaole in meertaelige regio’s.
- Technologische innovaosie kan juridische aachterstaand veur een pat wegwarken.
Zoks hoolt in: et debat over regionaole taelen moet niet allienig kultureel, mar ok institutioneel en technologisch voerd wodden. Een geliek speulveld veur de verschillende taelen vragt om:
- opni’j overwegen tot Diel III-erkenning veur et Stellingwarfs Nedersaksisch
- ruumte veur decentraole, gebiedsgerichte oplossings
- strukturele financiering van beleid veur regionaole taelen
- investering in digitaole infrastruktuur
De prissentaosie van Zandberg zien rappot wodt eupend en kot inleided deur Ageeth Bos, veurzitter van de Stichting Stellingwarver Schrieversronte, et Stellingwarver streektaelinstituut.
Vervolgens geft de heer Zandberg de prissentaosie van zien rappot, zoks an de haand van een powerpoint.
Daornao volgt de anbieding an verschillende geneudigden en de SSR-veurzitter. In ansluting is d’r gelegenhied tot et stellen van vraogen en is d’r een gedaachtewissling mit anwezigen die vraogen stellen willen. De bi’jienkomst is in et gebouw van de Stellingwarver Schrieversronte, Willinge Prinsstraote 20 in Berkoop, en begint om 19.30 ure.
Iederiene welkom, de Intree is vergees. Wel woj’ vraogd je even an te melden op info@stellingwarfs.nl
