IM Ate Mulder (* Makkinge 16-01-1952 – †Makkinge 05-09-2025)
Vleden weke is oonze vri’jwilliger Ate Mulder uut Makkinge uut de tied raekt. In zien warkzeme leven was hi’j veehaandeler, mar in zien vri’je tied schreef hi’j in et Stellingwarfs. Ate was altied betrokken bi’j et wark van de Schrieversronte en bi’j et Stellingwarfs. Ate was een man mit een starke eigen miening. As hi’j et argens niet mit iens was, dan leut hi’j dat heuren. Dan kon et wel es knetteren…
Ate was jaorenlang lid van de schrieversklub Letterstreken die ien keer in de acht weken bi’j de Stellingwarver Schrieversronte bi’j mekeer komt om et schriefwark te bespreken. Hi’j publiceerde onder de naeme Tuller. Doe Ate een klein joongien was en nog niet zo goed praoten kon, sprak hij zien naeme zo uut.
Ate was een echte Makkingester, hi’j was jaorenlang lid van de Makkingester ooldejaorsploeg (MOP) en schreef d’r bi’j et veertigjaorig jubileum een boek over mit de titel De hoed en de raand. Ok de geschiedenis van Makkinge interesseerde him, hi’j gaf in eigen beheer een boek uut over et oorlogsverleden van zien dörp.
De Schrieversronte verlöst in Ate een man mit een hatte veur de Stellingwarver tael en kultuur. De Schrieversronte weenskt de femilie veul starkte toe.
