In et Nedersaksisch taelgebied is et al jaoren de goeie gewoonte dat d’r in de meertmaond nog wat meer ommedaenken is veur de streektael en in oons geval et Stellingwarfs. De Schrieversronte het zaoterdagmiddag 1 meert de meertmaond officieel eupend. Direkteur Abel Darwinkel vreug de omdebi’j vuuftig bezukers om de kommende maond nog meer Stellingwarfs te praoten as aanders.
De Schrieversronte het disse eerste dag van meert twie boeken prissenteerd: de Stellingwarver vertaeling De kleine preens van Christine Mulder en de verhaelebundel Een betien appat is hiel gewoon van Jaap Sikkema. Ok et tiedschrift Wiesneus 2025 wodde prissenteerd. Et is van et jaor de darde keer dat et tiedschrift uutdeeld wodt an alle kiender van de basisschoelen. De ni’je boeken wodden goed verkocht en alle bezukers kregen een Wiesneus mit.
Zanger Karst Berkenbosch en gitarist Mark Verbeek zorgden disse middag veur een mooi stokkien meziek.
