De Drentse, Grunniger, Stellingwarver, Sallaanse, Twentse, Achterhoeker en Veluwse streektaelorgenisaosie prissenteren mit mekeer et ni’je inspiraosiedokement Streektaal en erfgoed. In disse publikaosie lao’we zien hoe as arfgoedinstellings een aktieve rol speulen kunnen in et verstarken en zichtber maeken van streektael.
Betekenisvol stee in de peblieke ruumte
Et dokement staot vol veurbeelden en praktische idenen om streektael een dudelik en betekenisvol plak te geven in de peblieke ruumte. Musea, archieven en historische verienings kun d’r inspiraosie in vienen om heur pebliek te betrekken mit streektael in pergrammering, kommenikaosie en peblieksaktiviteiten.
Saemenwarking arfgoed- en streektaelorgenisaosies
Et inspiraosiedokement is votkommen uut een daenkwarksessie mit mitwarkers van arfgoedinstellings en streektaelorgenisaosies. De inzichten uut disse sessie binnen anvuld mit mooie veurbeelden uut verscheedene Nedersaksische regio’s. Van taelmarkerings in tentoonstellings tot meerspraokige audiotours en van streektaelroutes tot kreatieve perjekten in de eupenbaore ruumte: et dokement lat zien hoe veulziedig en stark et bruken van streektael wezen kan.
“Streektael het de kracht om meensken stark te verbienen mit de geschiedenis, identiteit en leefwereld van een regio. Deur de tael zichtber en heurber te maeken, wodt arfgoed veur een brieder pebliek herkenber en toegaankelik,” zo geven de initiatiefnemers an.
Haandvatten
Et inspiraosiedokement geft dudelike haandvatten veur arfgoedprofessionals en neudigt heur om ni’je aktiviteiten mit de streektael te ontwikkelen. Et lat daornaost zien hoe as saemenwarking tussen tael- en arfgoedinstellings je brengen kan tot verrassende prejekten en et berieken van een ni’j pebliek.
Initiatiefnemers
Et opstellen van et dokement is een initiatief van de saemenwarkende streektaelorgenisaosies: Erfgoed in Groningen, Huus van de Taol, Overijsselacademie, Stellingwarver Schrieversronte en Erfgoedcentrum Achterhoek en Liemers (ECAL).
Et inspiraosiedokement kun jim hier daeleladen.
