Praot ie Stellingwarfs of een aandere Nedersaksische variaant? Dan kuj’ vanof 31 meert jow stemme geven via et online platform praoten.nl. Dit initiatief van hooglerer Martijn Wieling van de Rieksuniversiteit Grunningen (RUG) wil bi’jdraegen an de ontwikkeling van spraoktechnologie veur onder ere et Drents, Grunnings, Stellingwarfs, Twents, Veluws en Aachterhoeks. Veur welke variaant bin de meerste praoters te op ‘e bien te brengen? En wie zorgt d’r as eerste veur dat een uitspraoke as “piene in de beerlig” ok veur meensken die gien Nedersaksisch praoten mit een tillefoon in de buse begrepen wodt?
Leegdrempelig
Et Proaten-perjekt maekt et meugelijk om op grote schaol zinnen die zegd wodden in de verschillende Nedersaksische variaanten te verzaemelen. Dielnemers kunnen naemelijk op een leegdrempelige meniere vanuut huis aachter de komputer of via heur tillefoon of tablet mitdoen en heur stemme geven, deur ien of meerdere zinnen veur te lezen. Et perjekt staot onder leiding van biezunder hooglerer Nedersaksische/Grunninger Tael en Kultuur Martijn Wieling en wodt financierd deur de perveensies Grunningen, Drenthe, Frieslaand, Overiessel en Gelderlaand.
Doel van et perjekt
Mit de verzaemelde infermaosie wodt et meugelik om spraoktechnologie veur et Drents, Grunnings, Twents, Stellingwarfs, Veluws, Aachterhoeks en aandere variaanten van et Nedersaksisch te ontwikkelen en te verbeteren. Automatische spraokherkenning kan bi’jveurbield bruukt wodden om live ondertiteling te ginnereren of om Nedersaksische praoteri’je automatisch naor et Nederlaans te vertaelen. En een tekst-naor-spraoksysteem kan bruukt wodden om een tekst in verschillende variaanten veurlezen te laoten.
Martijn Wieling: “Het zou heel waardevol zijn als goede spraaktechnologie bijvoorbeeld in de zorg kan worden ingezet. Niet iedere verzorgende weet immers wat een spreker van het Stellingwerfs bedoelt met ‘ik hebbe zoe’n piene in de beerlig’.”
Spraoktechnologie kan daornaost meensken helpen bi’j de kommenikaosie en zorgen dat et Nedersaksisch toegankeliker wodt. Mar disse technologie kan allienig ontwikkeld wodden as d’r een hiele protte spraokmateriaol beschikber is. Veur vule taelen in de wereld, waoronder ok et Nedersaksisch, is dat now nog niet et geval. Mit praoten.nl (ok: proaten.nl) wodt perbeerd et Nedersaksisch digitaal mitdoen te laoten.
Martijn Wieling: “Ik roep alle sprekers van het Drents, Gronings, Stellingwerfs, Twents, Achterhoeks en alle andere varianten van het Nedersaksisch op om hun stem te doneren! Als iedere spreker maar een vijftal zinnen inspreekt, dan hebben we al veel meer materiaal dan er op dit moment voor bijvoorbeeld het Fries beschikbaar is.”
Kompetisie
Naost et helpen bi’j de ontwikkeling van spraoktechnologie veur et Nedersaksisch, maeken dielnemers die een account anmaekt hebben (dat is trouwens niet verplicht om zinnen inspreken te kunnen) kaans op een prijs. Drie maonen lange wodt d’r elke maond veur elke variaant van et Nedersaksisch onder de meerst aktieve bi’jdraegers een bodspel Streektaalstrijd verloot.
