De warkgroep Alles Rondom Taal ontvangt op donderdag 22 meie schriever Edward van de Vendel in de biebeltheek van Oosterwoolde.
Et wodt een biezundere aovend rond de prissentaosie van de Stellingwarfse vertaeling van et boek Misjka van Edward van de Vendel en Anoush Elman. Schriefster Attie Nijboer zorgde veur de vertaeling. Veur et schoft lao’we Edward van de Vendel vertellen over zien wark, nao et schoft wodt Attie interviewd deur Abel Darwinkel, direkteur van de Stellingwarver Schrieversronte.
Edward van de Vendel schreef al veul kienderboeken en boeken veur jongvolwassenen. In 2024 wun hi’j de Theo Thijssenprijs, de driejaorlikse staotspries veur zien hiele wark. Veur Misjka kregen hi’j en Anoush Elman in 2023 de Gouden Griffel. Et boek Misjka (uutkommen in 2022) gaot over Roya en heur dwargknienegien Misjka. As Roya met heur oolden en bruurs aendelik een huus kriegen in Nederlaand, vint ze dat daor ok een huusdier bi’j heurt. Et wodt een schattig dwargknienegien, en ze nuumt et Misjka. De hiele familie is aldergloependst wies mit him. Roya begint an Misjka te vertellen over de vlocht uut heur laand. Mar ze beseft dat ze daor zels lange niet alles meer van wet. En dan, op een dag, is Misjka inienend vot. Dit angriepende verhael over de liefde veur een huusdier en de vlocht van een gezin uut een oorlogsgebied is baseerd op waore gebeurtenissen. Misjka is vertaeld in o.e. et Duuts, Italiaans, en Fraans en d’r is now liekewel ok een Stellingwarfstaelige versie.
De aovend mit Edward van de Vendel begint om 20.00 ure. Kaorten kosten € 10,- koffie of thee inbegrepen bi’j binnenkomst en een draankien in de pauze. Jongeren tot 18 jaor betaelen € 5,-, verkriegber via www.kunstwerf.com
Disse aovend is een saemenwarking tussen Alles Rondom Taal en de Stellingwarver Schrieversronte.
Fotograaf Tim Buiting
