Schriefwedstried lat bomen praoten: verhaelen vol wottels en wieshied
Verhaelewedstried Schrieversronte naor et veurbield van ‘De eik was hier’ het indrokwekkende en ontroerende inzendings opleverd.
Et d’ri’jde allemaole om bomen bi’j de schriefwedstried die de Schrieversronte begin dit jaor uutschreef. Schrievers wodden nuugd een verhael te schrieven over een biezundere boom in de Stellingwarven. Zi’j konnen heur daorbi’j inspireren laoten deur et boek ‘De eik was hier’ van Bibi Dumon Tak, dat in 2024 in et Stellingwarfs vertaeld wodde. De schriefwedstried het een verzaemeling prachtige verhaelen opleverd, waorin biezundere bomen in de Stellingwarven een stemme kregen.
Van de zeuvenarmige iekeboom in De Rottige Meenthe tot bomen bi’j olderlike huzen, hiele bossen; de verhaelen weren even verschillend as biezunder. De schrievers leuten zien hoevule emosie, geschiedenis en verbielding d’r kan liggen in iene boom. Et is prachtig hoe iedere schriever zien of heur boom een stemme geven het. Mar d’r kan d’r mar iene de winnaor wezen en de jury het keuzen veur et verhael van Roelof Bakker over de beukeboom in Wolvege waorvan de schriever de laeste weens optekend het, veurdat de boom weghaeld is, omdat hi’j ziek was.
As daank veur et mitdoen hebben alle dielnemers een exemplaor van de Stellingwarver vertaeling van ‘Misjka’ kregen. Dit boek van schriever Edward van de Vendel is deur Attie Nijboer prachtig in et Stellingwarfs ommezet en is an et aende van meie prissenteerd.
Naor anleiding van disse schriefwedstried het Stien van Anne et verhael ‘Kwerkus’ schreven. Et verhael over de ‘Quercus Singelirus da Silva Montis’ – de biezundere iekeboom op ‘e Bosbarg gaot over de iekeboom in Appelsche, waorvan stokmennig jaor leden de mythe waor bleek; et zichtbere pat van de boom is alliend mar et toppien van een reusachtige boom die meters diepe onder de grond verbörgen zit. Dit verhael zal inkotten te beluusteren wezen via een QR-code naost de boom op ‘e Bosbarg.
Et verhael van Roelof Bakker is in kotten te lezen op disse webstee…
