De biebelthekekring Zuud-Oost Frieslaand wil meer en meer een maotschappelik plak wodden. Een biebeltheek is niet langer allennig een verzaemeling boeken, mar juust ok een stee waor as meensken kommen kunnen veur alderhaande vraogen over digitaol verkeer of oefenen kunnen mit de Nederlaandse tael. Omreden juust een biebeltheek is een plak veur tael, heurt et Stellingwarfs daor ok anwezig te wezen. En now is dat ok krek zo! Mit de subsidieregeling Zichtberens het Abel Darwinkel, veurmaelig direkteur van de Stellingwarver Schrieversronte, et veur mekeer kregen om in drie biebeltheken – Noordwoolde, Oosterwoolde en Wolvege – zulen daele te zetten waor as iederiene infermaosie zien en lezen kan over de Stellingwarver Schrieversronte. Infermaosie over ni’je aktiviteiten, ni’je uutgaeven en hoe as et Stellingwarfs weeromme komt in de peblieke ruumte.
Op vri’jdag 13 feberwaori was de lancering van disse zulen. Ni’je direkteur Arjan Sterken vertelde kot mar krachtig dat et now et juuste mement is om de tael levende te holen. Now binnen d’r nog genog sprekers om dit veur mekeer te kriegen en kuwwe de tael deurgeven an ni’je generaosies. Harmen Houtman dreug gedichten uut eigen wark veur. In zien wark klinkt dudelik deur hoe as et Stelllingwarfs een hiel poëtische tael is, waorin ok et alledaegse bi’jzunder wodt. Zo wodt et Stellingwarfs in woord en klaank zichtberder in beide Stellingwarven.
(foto maekt deur Lenus van der Broek)
