In een kollum in de Liwwadder kraante van 26 juli van Asing Walthaus ston dat de Friestaelige ober van Hotel Lunia gien Stellingwarfs leren wol. Vanzels bin de warknemers van Hotel Lunia meertaelig en perberen zi’j om de gaasten zo vule as meugelik in heur eigen tael te woord te staon.
De Stellingwarver Schrieversronte en Hotel Lunia binnen naobers en zoas dat in de Stellingwarven gebrukelik is; gaon wi’j as naobers op een plezierige meniere mit mekeer omme, wi’j hebben een goeie baand mit mekeer. Om dat nog es te onderstrepen het de Schrieversronte Hotel Lunia zes pakketties mooie biervilties anbeuden mit Stellingwarver teksten zoas; de locht is nog blauw van daegen, gaoj’ mit te flinterknippen? en even piepschoft. En Friese obers, Friestaelige meensken, nee alle meensken, bin van hatte welkom bi’j de Schrieversronte om Stellingwarfs te leren.
Op de foto ziej’ Kim Linse van Hotel Lunia die de biervilties annemt van Abel Darwinkel van de Schrieversronte. foto SSR
