Logo 50 jaar Stellingwerver schrieversronte

Stichting Stellingwarver Schrieversronte

Instituut veur Stellingwarver tael en kultuur, mit historisch en volkskundig archief

Ni’js

Stellingwarver vertaeling van Le petit prince

Et is op de Biebel nao et vaekst vertaelde boek op de wereld; Le petit prince van de Fraanse schriever en piloot Antoine de Saint-Exupéry, veur et eerst publiceerd in 1943. Schriefster Christine Mulder uut Wolvege het now zorgd veur een prachtige Stellingwarfse vertaeling mit de titel De kleine preens. Et boek is uutgeven deur de Stellingwarver Schrieversronte in saemenwarking mit Verlag Edition Tintenfaß.

Et liekt dat De kleine preens een kienderboek is, et gaot over een kleine preens die woont op een klein planetien, B612. Mar ok veur de volwassen lezer is d’r in dit boek vule moois te lezen en te leren. Ien van de bekendste zinnen in et boek is: we zien alliend zuver mit et hatte. Wat waorlik belangriek is, kuwwe mit de ogen niet zien.

Et boek is schreven deur Antoine de Saint-Exupéry in 1943. De schriever was piloot in de Twiede Wereldoorlog en is in 1944 mit zien vliegtuig verongelokt boven de Middellaanse Zee. De brokstokken van et vliegtuug bin pas een jaor of tien leden weerommevunnen.
Et boek Le petit prince is in een protte laandstaelen en streektaelen ommezet. De eerste Nederlandse vertaeling was van Laetitia de Beaufort-van Hamel, die in 1951 uutkwam. In de jaoren ’90 kwam d’r een Friese vertaeling van Jacobus Q. Smink. Laeter bin d’r twie Limburgse vertaelings uutkommen, een Noord-Drèentse van oonze direkteur Abel Darwinkel, een Bildtse, een Grunnegse en een Twentse (van Herman Finkers). In 2021 het Erik van Muiswinkel een ni’je Nederlaanse vertaeling maekt. Vleden jaor is d’r ok nog een Amsterdamse vertaeling uutkommen.
Dat, et wodde now wel es tied veur een Stellingwarfse vertaeling.

Christine Mulder vertelt over de vertaeling in de uutzending Underweis van Omrop Fryslan op 15 jannewaori. Op 1.42 kuj’ et vienen: https://www.omropfryslan.nl/nl/radio/programma/underweis/1055952