De Kursus Stellingwarfs veur beginners gaot ankem jaor op zaoterdagmorgen 17 en 24 jannewaori 2026 uut aende in et gebouw van de Stellingwarver Schrieversronte, Willinge Preensstraote 20 in Berkoop. De lessen duren van half tiene tot 12.00 ure.
Et is een kursus speciaol veur meensken die de Stellingwarver tael niet van huus uut mitkregen hebben. Een aorig groepien meensken het him al anmelded, mar d’r kun nog een peer kursisten bi’j.
As jim belangstelling hebben veur disse kursus Stellingwarfs veur beginners, moej’ even een mailtien sturen an info@stellingwarfs.nl of jim kunnen ok even bellen mit 0516-451108, van maendag tot en met donderdag, tussen 09.00 en 14.00 uur
Vaeke wodde disse kursus zes weken geven op de maendagaovend, mar omdat vule meensken niet zes aovens aachter mekere willen, het de Schrieversronte d’r veur keuzen om de kursus op twie zaoterdagmorgens te geven.
De Stellingwarver Schrieversronte geft alle inwoners de kaans om deur disse kursus kennis te maeken mit de Stellingwarver tael en kultuur. De kursus kost mar 20 euro inclusief koffie, thee en kursusmateriaol.
D’r is de laeste jaoren al mar meer belangstelling veur et Stellingwarfs en veur et Nedersaksisch, waor et Stellingwarfs, krek as et Grunnings, et Drents, et Sallaands en et Aachterhoeks bi’j heuren.
De Schrieversronte het erveren docenten, die op alle onderdielen van de tael ingaon: grammatika, spelling en schrieveri’je, mar ok geschiedenis en de netuur in de Stellingwarven kommen an bod. Aj’ iene kennen die belang het bi’j een kursus as disse, dan kuj’m diegene ok zels verwiezen naor de Schrieversronte.
