Donderdagmorgen 9 april deden twintig leerlingen van et Comprix College uut Noordwolde eksamen Stellingwarfs bi’j de Stellingwarver Schrieversronte in Berkoop. Naodat ze et oflopen seizoen bi’j juf Ageeth Bos lessen Stellingwarfs volgd hadden, wodden ze deur Grietje Bosma toetst op heur mondelinge en schriftelike gebruuk van et Stellingwarfs. Et schriftelike pat beston uut een diktee en et schrieven van zinnegies n.a.v. een twintigtal woordkaorties. Die beide opdrachten wodden hiel goed maekt.
Veur et mondeling pat leuten de kiender in twietallen heuren wat ze et schierste Stellingwarfse woord vunnen. Woorden as “tot kiekes”en “babbelgoechies” kwammen veurbi’j. Tot slot zongen de examenkandidaoten twiej’ lieties in et Stellingwarfs.
An et aende van de eksamenmorgen dee blieken dat alle leerlingen et eksamen ommeraek goed daon hadden. Ze kregen daoromme allemaole een diplome uutrikt deur Arjan Sterken, direkteur van de Stellingwarver Schrieversronte.
Et was de elfde keer dat leerlingen van et Comprix College de kursus Stellingwarfs ofrondden mit een eksamen.
