Johan Veenstra op Eupen Stal
Meensken die de jaorlikse keunstmannefestaosie Eupen Stal in Berkoop dit jaor bekieken, kun al kuierende of fietsende de Stellingwarver schriever Johan Veenstra onderwegens twie keer tegenkommen. Zoas al haost gebrukelik is, is Veenstra dit jaor weer persent om zien boeken te verkopen en op verzuuk te signeren. Dat dot hi’j van ’t jaor zes van de zeuven middaegen in de weke. Hi’j nemt ien keer in de weke een middag vri’j en wodt dan vervongen deur een al lieke toeke verkoper of verkoopster. Ok dit jaor bin zien twie laeste boeken Et liek in de Lende en Naozoemerlaand veur een slieterspriesien te kriegen. Aj’ ze beidend kopen kosten ze tegere mar 29,95 euro. En dat veur twie mooie boeken in een had omslag! Griep jim kaans! Vanzels bin alle aandere Stellingwarver boeken ok te koop.
Tiedens de route is de stemme van Johan Veenstra alle middaegen van de weke te heuren. Hi’j vertaelde op verzuuk van de orgenisaosie van Eupen Stal et gedicht došla sam van de Servische dichteresse Vitomirka Trebova in et Stellingwarfs. De titel is dan ik kwam. Hi’j dee dat vanzels niet rechtstreeks vanuut et Servisch, mar vanuut de Nederlaanse vertaeling van Jelica Novaković-Lopušina. Onderwegens bin argens in Berkoop de Servische en de Stellingwarver versie te beluusteren.
Keunstmannefestaosie Eupen Stal wodt van ’t jaor hullen van zaoterdag 27 juli t/m zundag 25 augustus. Elke middag van ien tot zes ure.
Op de foto is schriever Johan Veenstra in ofwaachting van duzenden bezukers die allemaole zien boek kopen kunnen.
