Nije Stellingwarver Tomke
De Stellingwarfse Tomke is d’r weer. Tomke is een perveensiaol veurleesprejekt van de Afûk veur ukken. De van oorsprong Friestaelige verhaelties over et joongien Tomke en zien kammeraoties bin veur de Stellingwarfse ukken in et Stellingwarfs ommezet deur schriefster en vertaelster Sjoukje Oosterloo.
Et Tomke-boekien het van et jaor as thema: ‘Lekker eigenwies!’ en staot vol mit mooie verhaelties, lieties en gedichies. Et Tomke-prejekt wil oolders infermeren over et gebruken van tael in ’e omgang mit jonge kiender. Veurlezen en taelspellegies binnen belangriek veur alle taelen, ok veur et Stellingwarfs. De Stellingwarver veurleesweke in september wodt orgeniseerd deur de Stellingwarver Schrieversronte. D’r wodt uut et Tomkeboekien veurlezen bi’j de Stellingwarver ukkespeulplakken. As jow ok graeg een Tomkeboekien hebben willen, dan kuj’ even iene haelen bi’j de Schrieversronte in Berkoop, of iene telefonisch 0516-451108 of via email info@stellingwarfs.nl bestellen.
Wat Tomke betreft was d’r vleden weke ok een aekelig bericht. De tekener van Tomke, Luuk Klazenga, is wegraekt. Hi’j was nog mar zestig jaor. Klazenga was vanof et aldereerste begin de tekener van Tomke. Al 28 jaor zorgde hi’j veur de prachtige tekeningen die heurden bi’j de verhaelties over Tomke.
