Zundag 25 augustus was de laeste dag van Eupen Stal in Berkoop. Et was een drokke dag mit een goeie verkope. Et was de laeste keer dat Eupen Stal en de Schrieversronte saemenwarkten in et gebouw an de Willinge Prinsstraote 10. Volgend jaor doewwe zeker weer mit an Eupen Stal, mar dan in oons ni’je gebouw an de Willinge Prinsstraote 20.
Veur de Schrieversronte het Johan Veenstra weer de meerste daegen in de hal van de Schrieversronte zeten te boeken verkopen en de meensken (zowat 10.000 bezukers) van alles te vertellen over et Stellingwarfs, de Schrieversronte en de schrieveri’je en Eupen Stal. Dat het oons een mooi bedrag opleverd, mar veural een protte ommedaenken veur et Stellingwarfs.
In de week dat Johan deur ziekte uutschaekeld was, hebben Fettje Alten, Hennie Duin, Hendrik Betten, Hendrik Fokkema, Aukje Vries, Gerrie Koopstra, Roelof Dragt en Pieter de Jong de zaeken regeld. De Schrieversronte is d’r slim wies mit dawwe altied een beroep doen kunnen op zokke goeie vri’jwilligers.
