Eerste Stellingwarver stripboek van Frank Spijkers
In de ofgelopen weke is et eerste Stellingwarver stripboek uutkommen. Et stripboek is tekend en schreven deur Frank Spijkers en het as titel Een honneleven, De aeventuren van Otto, heer van Buil. Et boek is uutgeven deur de Stellingwarver Schrieversronte. Et is te koop veur mar € 9,95 te koop bi’j de Schrieversronte, op disse webstee bi’j boeken en bi’j de boekhandel.
Frank Spijkers is zeker gien onbekende in de Stellingwarven. Al jaoren timmert hi’j an de weg as histotolk. Hi’j perbeert historische Stellingwarfse gebeurtenissen weer tot leven te wekken. Zo was Frank al in 2009 betrokken bi’j de viering van et 700-jaorig bestaon van Stellingwarf. Bi’j die gelegenhied het hi’j et tiepien Otto, heer van Buil, bedocht veur een veurstelling over de slag bi’j Vollenhove in 1309. Et was et begin van een now al weer vuuftienjaorige saemenwarking! Ok het hi’j mitwarkt an veurstellings tiedens de herdenking van et Rampjaor 1672.
Jim kun Frank ok kennen van zien strip in De Ovend, mar hi’j het in 2009 al et boekien Weeromme naor Stellingwarf schreven en tiekend en in 2011 De wraoke van Pieter Stoefzaand. Beide boeken bin deur Sjoukje Oosterloo vertaeld in et Stellingwarfs.
Ok disse beide boeken weren eins stripboeken, mar op een wat oolderwetse meniere: et bin boeken mit stroken zwat-wit plaeties waor de tekst onder staot, zoks as de oolde Kaptein Rob kraantestrips. ‘Et wodde tied veur een ‘echt’ stripboek in kleur, waor de tekst in de plaeties in wolkies schreven is,’ zegt Frank. Ok et formaot van een stripboek is vanzels hiel eers as de beide eerste boeken van Frank. Dit het echt et formaot van een stripboek, zoas elkeniene die kent. De strips in dit eerste Stellingwarver wolkies-stripboek, bin veur et aldergrootste deel ni’j. Pattie bin al een keertien in De Ovend verschenen.
De heufdpersoon is Otto, een middelieuwse kesteelheer die leeft in et begin van ‘e veertiende ieuw. Hi’j is arg overtuugd van zien eigen kunnen, eren bin dat niet. Ongeveer alles wat as hi’j ondernemt mislokt dan ok. Et is daoromme gien wonder dat hi’j himzels miskend en onbegrepen vuult. Veerder is Otto opvliegend, staot gauw in de braand en het gien hinder van ok mar een klein betien zelskennis.
Over ‘Een Honneleven’
Krek as zoveul van oons wil Otto een hond. Krek as zoveul van oons zonder him daor op veur te bereiden, want dat het hi’j niet neudig. Honne-trenings bin dan ok flauwekul, want ok die bin niet neudig. Een oolde Griekse filesoof het ooit es zegd: ‘Een perbleem is pas een perbleem as et as een perbleem erveren wodt.’ Wieze woorden van een wies man, vanzels. Mar om kot te gaon: Otto het krek as zo veul van oons een honnefluusterder neudig… Een stripboek vol mit grappige en hiel herkenbaore situaosies, of ie now een hond hebben of niet…
Frank Spijkers – Een honneleven, De aeventuren van Otto, heer van Buil. Uutgeven deur de Stellingwarver Schrieversronte, opmaek Bauke Visser-Koenders uut Haulerwiek. ISBN: 978-90-6466-213-3. Foto SSR: Frank Spijkers mit zien ni’je Stellingwarver stripboek.
