Et bestuur van de Stichting Stellingwarver Schrieversronte neudigt de bezukers disse webstee van hatte uut veur et eupen huus van et ni’je gebouw van de Schrieversronte op zaoterdagmiddag 19 oktober 2024 om 15.00 uur an de Willinge Prinsstraote 20.
De laeste jaoren is d’r deur et bestuur van de Schrieversronte en deur de warkgroep huusvesting hadde warkt om een ni’je mederne huusvesting veur de Schrieversronte te regelen.
Eerst wodde perbeerd om oons gebouw an de Willinge Prinsstraote 10 op te knappen, mar doe blieken dee dat dat te duur wodde, hebben bestuur en warkgroep een ni’j plak vunnen veur de Schrieversronte; in Business Centre Berkoop an de Willinge Prinsstraote 20.
In et laeste half jaor is daor vule wark verzet om et gebouw klaor te maeken veur de aktiviteiten van de Schrieversronte. Wi’j kun jim alvast vertellen dat et mooi, medern, gebruuksvrundelik en zels wel een betien ‘sjiek’ wodden is. Daor bin wi’j wies mit en daoromme wiwwe graeg mit jim et gebouw feestelik eupenen op zaoterdagmiddag 19 oktober.
Tussen 14.00 uur en 15.00 uur is de officiele eupening veur geneudigden. Van 15.00 uur is d’r veur elkeniene gelegenhied om te kommen kieken.
Wi’j hebben van 15.00 uur of een prachtig Stellingwarfs programma saemensteld mit veurdrachten, meziek en een warkwinkel striptekenen, en vanzels kan iederiene et gebouw bekieken.
