Vanof disse weke bin bi’j de Stellingwarver Schrieversronte in Berkoop natuurfoto’s op kanvas te zien van Femia de Weijer uut Else. Aj’ de foto’s zien willen bi’j’ de kommende twie maonden op deensdag en donderdagmiddag van 13.00 tot 16.00 uur van hatte welkom. De toegang is ommenocht.
Femia de Weijer woont sund augustus 2020 mit heur man Paul in Else. Daorveur woonden zi’j 25 jaor in Franeker. Femia wol graeg wonen in de bosrieke omgeving om Else henne en geniet d’r een protte van. Et fotograferen in de netuur is heur passie. Kenmarkend veur heur foto’s is dat gien plaante of diertien buten de lens van heur fototoestel blift. Et inspireert heur om biezundere mementen op de foto vaaste te leggen. “Mien doel mit elke foto is om waj’ zien in een bield te vangen, zonder dat et een gewoon kiekien wodt,” zegt de fotografe.
In de grote zael van et gebouw van de Stellingwarver Schrieversronte hangen twintig foto’s mit een formaat van 60 x 80 centimeter. Et bin allemaol tuunposters van ‘kanvas’, UV-bestendig, kleurecht en regenvaaste. Hiel geschikt om an de schutting of in et tuunhusien te hangen. De scharpe foto’s van uutienlopende netuurmomenten bin allemaole in disse kontreien maekt. De doeken bin te koop.
