Schrieversronte organiseert kursussen Stellingwarfs
De Stellingwarver Schrieversronte trakteert belangstellende inwoners op gratis kursussen an et begin van 2024. Der wodt een kursus ‘Stellingwarfs veur beginners’ organiseerd veur meensken die al Stellingwarfs praoten kunnen en d’r zal ok een kursus geven wodden an meensken die van huus uut gien Stellingwarfs praoten, mar wel interesse hebben veur de tael en kultuur van de Stellingwarven. Beide kursussen bestaon uut zeuven lessen die geven wodden in de maonden feberwaori en meert 2024. De kursusdag is maendagaovend. De lokatie….
As jim belangstelling hebben veur ien van disse beide kursussen Stellingwarfs hebben, moej’ even een mailtien sturen an info@stellingwarfs.nl of jim kunnen ok even bellen tiedens kantooruren 0516-451108. Aj’ iene kennen die belang het bi’j een kursus as disse, dan kuj’m diegene ok zels verwiezen naor de Schrieversronte.
De Stellingwarver Schrieversronte gef alle inwoners de kaans om ommenocht kennis te maeken mit de Stellingwarver tael en kultuur. D’r is de laeste jaoren al mar meer belangstelling veur et Stellingwarfs en veur et Nedersaksisch, waor et Stellingwarfs, net as et Grunnegs, et Drents, et Sallaands en et Achterhoeks bi’j heuren.
Kursus veur ni’j Stellingwarvers
Jow praoten de tael nog niet. Jow willen in de kunde kommen mit Stellingwarvers, de Stellingwarver tael en de kultuur? In disse kursus vertellen we over de historie van de Stellingwarven en leren we de eerste beginselen van die tael. An et aende van disse kursus kuj’ jezelf veurstellen in et Stellingwarfs en een stokmennig woorden en zinnegies bruken in et Stellingwarfs.
kursus ‘Stellingwarfs veur beginners’.
Disse kursus is vanzels hatstikke interessaant veur meensken die de tael al verstaon.
Meensken die de tael niet van huus uut mitkregen hebben, mar ok veur inwoners die alle daegen Stellingwarfs praoten, is d’r op disse kursus genog te leren. Want waor komt dat Stellingwarfs now aenlik weg, we wonen toch in Frieslaand? Hoe lange wodt d’r al in et Stellingwarfs schreven en wanneer schrieven we now een ‘ao’ en wanneer een ‘ae’? Veur et antwoord op zokke vraogen en vule meer orgeniseert de Stellingwarver Schrieversronte de kursus ‘Stellingwarfs veur beginners’.
De Schrieversronte het erveren docenten, die op alle onderdielen van de tael ingaon: grammatika, spelling en schrieveri’je, mar ok geschiedenis en de natuur in de Stellingwarven kommen an bod.
