Stellingwarver Schrieversronte nemt podcast op
De Stichting Stellingwarver Schrieversronte gaot in 2024 mit wat ni’js beginnen.
D’r wodt een podcast maekt mit as titel Huus en Hiem. Elizabeth Bergsma zal meensken interviewen die wat over de Stellingwarven vertellen kunnen. Tussendeur zal d’r meziek te heuren wezen. Veul van de gesprekken zullen in et Stellingwarfs wezen. Een uutzending zal zoe’n 60 minuten duren en is te beluusteren via de lekaole omroep Odrie, mar vanzels zullen de uutzendings ok later te beluusteren wezen via de website van de Schrieversronte www.stellingwarfs.nl . In et verleden bin d’r vanzels al eerder radioprogramma’s maekt die now as podcast op disse webstee te beluusteren binnen, zoas Huus en Hiem (doe ok al) en In Twielochten.
Et podcast-projekt is bedoeld om et Stellingwarfs op et Internet meer ruumte te geven. Zo is d’r al een beginnerskursus Stellingwarfs te volgen via Instagram. En staon d’r video’s op YouTube mit tips veur et gebruuk van et Stellingwarfs. Now komt daor dus een podcast bi’j.
De podcast wodt maekt veur meensken, die geïnteresseerd binnen in de tael, de kultuur, de geschiedenis, volksverhaelen, tredisies, de toekomst, d’r zit veur iederiene wel wat tussen. In de podcast wodt praot mit meensken, die kunde van et Stellingwarfs hebben. Netuurlik wodt d’r praot over et ontstaon van de tael en de ontwikkelings. Mar we gaon et ok hebben over Stellingwarfs en et onderwies; de netuur; schrieveri’je, tredisies in et gebied; meziek en gao zo mar wieder.
De eerste uutzending is opneumen en al te beluusteren. D’r is praot mit Henk Bloemhoff over zien relaosie mit et Stellingwarfs. Henk het verteld over et ontstaon en de ontwikkeling van et Stellingwarfs. D’r wodt ophelderd of et Stellingwarfs now een dialekt of tael wezen zol en an et aende dot hi’j een veurspelling veur de toekomst van et Stellingwarfs.
Beslist de muuite van et luusteren weerd.
Odrie zendt Huus en Hiem elke zundag om 11.00 ure uut. Disse uutzending wodt herhaeld op vri’jdag om 16.00 ure. Via de ether is Odrie te heuren op 106.9 FM.
Digitaal kuj’ luusteren via Ziggo 923 | KPN 1196 | Delta 800 | Kabelnoord 814
As podcast is Huus en Hiem te luusteren via Spotify, Anchor, Google en Soundcloud. De podcast wodt mogelijk maekt deur de Stichting Stellingwarver Schrieversronte, perveensie Frieslaand, Mulder van Opsterland Stichting. De techniek wodt verzorgd deur Andries Oppersma van Odrie.
