Op woensdagaovend 22 meie treden de schrievers Johan Veenstra en Douwe Kootstra op bi’j boekhandel Binnert Overdiep. De aovend begint om 19.30 ure en duurt tot 21.00 ure. De aovend kost niks, mar ie moe’n jow wel even anmellen.
Een gezaemelik optreden van de schrievers-vertellers Johan Veenstra en Douwe Kootstra komt niet vaeke veur. As literaire entertainers timmeren zi’j al hiel lange an de weg. In veertig jaor tied hebben zi’j meer as 4500 keer optreden in en buten de perveensie. Beiden hebben ok jaorenlang spraokmaekende kollums veur Omrop Fryslân had.
De aovend bi’j boekhandel Binnert Overdiep wodt, in saemenwarking mit de Stellingwarver Schrieversronte, orgeniseerd omdat Veenstra al vuuftig jaor schriever is en vleden jaor zien dattigste boek, Naozoemerlaand, verschenen is.
Et biezundere pergramme bestaot onder eren uut een gesprekkien mit de oer-Stellingwarver Veenstra, die ok zien Friese kollega-schriever et hemd van et lief vraogen zal. En netuurlik vertellen beide schrievers uut eigen wark. Een opvalend aander onderdiel is dat de schrievers tegere een wried-erotisch verhael heuren laoten zullen in de taelen waor ze al zo lange in vertellen en schrieven: et Fries en et Stellingwarfs.
Aj’ d’r bi’j wezen willen, kuj’ jow ommenocht anmelden bi’j boekwinkel Binnert Overdiep via info@binnertoverdiep.nl
