In de weken nao de veurjaorsvekaansie kriegen alle kiender van de basisschoelen in de Stellingwarven ommenocht et tiedschrift Wiesneus mit naor huus.
Et prejekt Wiesneus lopt al een jaor of tiene in Drenthe en ere Nedersaksische perveensies, mar et is now veur et twiede jaor dat de Stellingwarven ok mitdoen an dit onderwiesprejekt. Alle teksten bin prachtig vertaeld deur de Stellingwarver schriefster Christine Mulder.
In et 16 bladzieden tellende tiedschrift staon verhaelen, gedichten, puzels en een kleurplaete. Veur elke leeftied is d’r wat te lezen en wat te doen. Kiender die een mooie kleurplaete insturen of een goeie oplossing van de puzel, kunnen een mooi pakket mit kienderboeken winnen.
Et eerste exemplaor wodt op vri’jdag 1 meert, as begin van meertmaond-streektaelmaond uutrikt op de Oosterbrink in Buil.
Hieronder et gedicht Vleermoes uut de Wiesneus. Dit gedicht was schreven in Veenkeloniaol Drents. Christine Mulder het et ommezet in et Stellingwarfs.
Vleermoes
Ik kan niet slaopen
Ik bin bange
Veur de vleermoes
Kom now dan
Kiek dan heit.
Lig niet zo te mierken
Dat is gewoon ’n scheure
In et behang, mien kiend
Hier hej’ wat waeter
Heit dot de deure dichte
Heit gaot de trappe of
Naor beneden
De vleermoes lacht
‘’t Zal jow heit mar wezen!’
Cobi de Jonge
