De warkgroep Alles Rondom Taal ontvangt op donderdag 16 meie schriefster Bibi Dumon Tak in de biebeltheek van Oosterwoolde. Anleiding veur heur bezuuk an de Stellingwarven is de prissentaosie van de Stellingwarver vertaeling van heur kienderboek ‘De eik was hier’, dat ze schreef veur de ‘Maand van de Filosofie’ in 2021. Christine Mulder vertaelde et as Ieken was hier. Op woensdag 15 meie wodt et Stellingwarfse boek ‘Ieken was hier’ an twie basisschoelen anbeuden.
Op ’e donderdagavond is d’r ommedaenken veur disse vertaeling, en wodt vertaelster Christine Mulder interviewd, waornao Bibi vertellen en veurlezen zal.
Bibi Dumon Tak is veural bekend van heur kienderboeken, al schrift ze liekewel ok veur volwassenen. Ze schrift non-fictie. Of zoas ze et zels nuumt: de waorhied in verhaelen. Et grootse pat van die verhaelen gaon over dieren. In 2018 kreeg ze de Theo Thijssenprijs veur heur hiele oeuvre, en in 2023 de Woutertje Pieterse Prijs en Zilveren Griffel, tegere mit illustrator Annemarie van Haeringen veur ‘Vandaag houd ik mijn spreekbeurt over de anaconda’.
Heur eerste boek dat niet veur kiender bedoeld was, verscheen in 2007, ‘Rotjongens’. Et gaot over et leven in een jeugdgevangenis. Veur dit boek praotte ze mit jonge gevangenen. Heur roman ‘De dag dat ik mijn naam veranderde’ (2020) wodde in meert 2021 nommineerd veur de Boekhandelsprijs. In augustus 2023 was zi’j iene van de gasten en et tillevisiepergramme ‘Zomergasten’.
De aovend mit Bibi Dumon Tak begint om 20.00 ure . Kaorten kosten € 10,- koffie of thee inbegrepen bi’j binnenkomst en een draankien in de pauze. Jongeren tot 18 jaor betaelen € 5,-, verkriegber via www.kunstwerf.com
Disse aovend is een saemenwarking tussen Alles Rondom Taal en de Stellingwarver Schrieversronte.
