Zelden wor ik nog bliede van et ni’js…
Hier is et te dreuge, daor weer vusen te nat
De regering is demissionair, ligt op zien gat
Bossen staon in de braand, huzen vatten vuur en vlam
Oorlog legt de graonhaandel naor aarme lanen lam
Et waeter van oonze rivieren is eernstig versmeerd
De migraosiediel mit Tunesië, gaot die niet op ‘e kop verkeerd?
Ik zocht mar es en gao over tot de odder van de dag
Niet gerust, niet hiel bliede mar dan inienend komt toch die lach…
Et initiatief van de buurtcamping komt op ‘e tillevisie veurbi’j!
Ik zie bliede gezichten, speulende kiender, allemaol tenten op een ri’j
Et park wodt ommetoverd tot een smoek campingplak
Alle bewoners, die de buurt riek is, vienen hier heur gerak
Even een peer daegen vekaansie holen is et idee, even van huus
Ni’je erverings dielen mit et vertrouwde van thuus
Zo leer ie alle meensken kennen die in jow buurt wonen en warken
En dat zal grif de onderlinge baand verstarken
Zoe’n initiatief zorgt veur inspiraosie, is veur vrundschoppen een behoold
Disse daegen van plezier en vertier nemen de kiender mit in heur onthoold
Doukies op schoele kommen heur aeventuren en verhaelen grif weer te praot
Ik mag lieden dat in de kommende jaoren in mennig park zoe’n buurtcamping staot!
In et Parool wodt zoks as een ‘ideaole saemenleving in et klein’ omschreven
Daor wiwwe en moewwe mit mekere zoveul meugelik naor streven.
Attie Nijboer – juli 2023
