In Memoriam Jimmy Visser (* Wolvege 1-8-1948 – †Wolvege 17-10-2022)
De Stellingwarver schriefster Jimmy Visser is uut de tied raekt. Jimmy is 74 jaor wodden.
Jimmy maekte van et begun of an diel uut van de Stellingwarver schriefgroep Letterstreken die al meer as twintig jaor bestaot. In de bundel Studentehaever (SSR 2006), een bundel mit wark van een groep kursisten kreatief schrieven in et Stellingwarfs, staot een gedicht en een verhael van Jimmy. Van 2000 tot 2013 het Jimmy in de redaksie van et tiedschrift De Ovend zeten.
Jimmy gruuide op in Wolvege in de Karkstraote en wus hiel vule over dit plak. Ze was een echte Stellingwarfse en kon in die tael prachtige verhaelen en gedichten schrieven en ok veurdregen. Jimmy was bescheiden, ok over heur eigen schrieven, mar binnen de schriefgroep Letterstreken ston zi´j bekend om heur goeie idenen. Zo bedocht ze zels een straote mit de naeme ‘De Steeg’ waornao de ere schrievers allemaole een nummer van een huus in disse straote kregen, mit een kotte beschrieving en daor mos dan een verhael over maekt wodden.
De Schrieversronte zal Jimmy Visser missen. Hieronder een gedicht van heur.
Veurbi’j
De show is an zien aende kommen
De akteur zwiegt
zwiegt veur altied
Et is stille
Doodstille
Applaus niet meer te heuren
Decibels tot nul reduseerd
Zien naeme, eertieds op ieders lippe
wodt niet meer uutspreuken
wodt niet meer heurd
is mit et uutdollen van zien graf
wegraekt en toedekt mit
een grauwe stien
roem is niet ieuwig
roem duurt mar kot
aj’ et zwiegen d’r toedoen
is ‘t rap vot.
Jimmy
