Op vri’jdagaovend 14 juli komt in mfc De Ni’je Stienze in Ni’jhooltpae et ni’je boek van Johan Veenstra uut: de verhaelebundel Naozoemerlaand. Et is de bedoeling dat et een mooie literaire aovend wodden gaot. De schriever zal twie verhaelen uut et boek veurlezen. De meziek wodt verzorgd deur de Friese zangeresse Grytsje Kingma uut Suntjehannesge. Johan en Grytsje verzorgen mit ienige riegelmaot tegere een Stellingwarfs/Fries pergramme veur verschillende groepen volk.
Et eerste exemplaor van et boek zal anbeuden wodden an Frits van der Vinne van boekhaandel Zwikstra in Wolvege. Hi’j het deur de jaoren henne een protte Stellingwarver boeken verkocht. Nao 125 jaor hoolt Zwikstra lichtkaans op te bestaon. De femilie Van der Vinne stopt d’r in ieder geval mit. Lao’we hopen dat de boekhaandel overneumen wodden kan deur iene die krek zovule liefde veur et boekevak het as Frits van der Vinne altied hadde!
Naozoemerlaand is te koop in alle goeie boekwinkels, bi’j de Stellingwarver Schrieversronte in Berkoop, tiedens de sutelaktie, en bi’j de schriever, thuus in Ni’jhooltpae. Tiedens de keunstmannefestaosie Eupen Stal in Berkoop, van 29 juli t/m 27 augustus, signeert Veenstra praktisch elke dag zien ni’je boek in et gebouw van de Stellingwarver Schrieversronte. Dit is de zesde keer dat hi’j een maond laank op ’e Eupen Stal boeken an de man brengt. Krek as vleden jaor is d’r in de hal van et Schrieversronte-gebouw een gezaemelike boekekraom mit Stichting Nobilis van De Fochtel.
Naozoemerlaand is een bundel mit 28 meerst ontroerende verhaelen. Johan Veenstra schrift zoas altied beeldend en herkenber over hiele verschillende meensken. Et kun je naosten wezen of je buren. Et kan de schriever zels wezen of de lezer. Ie zien et leven van al die meensken en wat ze mitmaeken as et waore veur je ogen gebeuren en beleven mit wat as zi’j beleven. En dat allemaole in et mooist daenkbere Stellingwarfs. Laot je mitnemen, verrassen en ontroeren deur de schriever. Mar geniet veural van al die biezundere en mooie verhaelen.
Johan Veenstra het dit boek haost hielemaole in coronatied schreven doe hi’j zomar inienend nargens meer henne kon om verhaelen te vertellen. Mar schrieven kon nog wel! Et eerste verhael, Waeterpreens, is schreven in september 2019, vlak veurdat et malle virus oons over ’t mad kwam. Et laeste verhael, San Fernando, is van augustus 2022, doe et virus veur et grootste pat bedwongen leek te wezen. Wat vint de schriever aenlik zels van zien ni’je boek?
Johan Veenstra: ‘An de iene kaant vien ik dit de mooiste verhaelen die’k ooit schreven hebbe. An de aandere kaant bin’k altied slimme onwisse. Dat he’k eins bi’j elk ni’j boek. Is et wel wat, daenk ik dan bi’j mezels. Ik bin nooit zo verzekerd van mien eigen kunnen. Mar dat is misschien ok mar goed.’
De schriever zit zo staorigan in de naodaegen van zien schrieversleven. Hopelik is dit niet zien alderlaeste boek, mar et is in ieder geval wel ien van zien laeste boeken. Dat is een ding dat zeker is.
Et boek telt 224 bladzieden en et komt in een oplaoge van 1.000 exemplaoren uut in een had kaft. Opmaek en omslagontwarp bin van Sijtze Veldema van Stilet Vormgeving in Dwingel. Et wodt drokt bi’j Printbase b.v. in Suntjehannesge. De verkooppries is 16,95 euro. Dat is veur zoe’n dik boek in een had kaft mit leeslint een slieterspriesien! Van vri’jdag of te bestellen op disse webstee.
