Logo 50 jaar Stellingwerver schrieversronte

Stichting Stellingwarver Schrieversronte

Instituut veur Stellingwarver tael en kultuur, mit historisch en volkskundig archief

Ni’js

VEURJAOR

De tietelrozen kommen al weer boven de grond,

et bluuiend hoolt het al weer klokkies.

De voegels, zi’j vliegen al weer driftig in ‘t rond,

op zuke naor strogies en stokkies.

 

De katties verschienen al an boom en an struke;

et lieken flewielige proppies.

De wilgen hebben weer een lochtiggrune pruke,

de tulpeboom het al weer knoppies.

 

De sni’jklokkies hebben heur tied al weer had,

douk zullen de tulpen al bluuien.

De boeren verstrujjen heur dong over et laand.

et is veurjaor, et grôs giet weer gruuien.

 

De kiewieten dukelen weer hoge in de locht;

de reiger stiet stille langs et waeter.

De kramsvoegels bin naor et noorden vlocht,

luud klinkt d’r et entegesnaeter.

 

De locht vuult zo zuver, zo tintelend dreuge,

vol frisse en kruderige geuren.

Now tovert weer Moeder Netuur veur oons oge

een palet mit de prachtigste kleuren.

 

Et straolende zunnelocht, zo helder en klaor

het haegel en kooide verdreven.

Wi’j staon veur de mooiste tied van et jaor et veurjaor,

vol kleur en vol leven.

 

Maekt deur Sake Russchen

Uut: De Ovend, april 2012