De aovend van de Stellingwarver Dag op 1 juli in Oolde- en Ni’jlaemer wodt ongetwiefeld een feestelike aovend. Dat zal mitien al blieken doen nao de eupening van de aovend as et pergramme begint mit een prissentaosie van de ooldste leerlingen van basisschoele ’De Lamer’. Zi’j laoten in die veurstelling zien wat ze in de weke veurofgaonde an de Stellingwarver Dag tiedens een Stellingwarfs projekt allemaole daon hebben. Veul ommedaenken is d’r in et projekt veur de netuur, en dan mit naeme et waeter in de omgeving. Zo zorgt Fryske Geamitwarker Henk Jager van Berkoop veur een exkursie mit as thema ‘Waeterbesies’, d’r wo’n Stellingwarver verhaelen verteld, de leerlingen schrieven Stellingwarver gedichten en d’r is et daans- en expressieprojekt rond verhaelen over de Stellingwarver moes Piepmoes.
Nao de leerlingen van De Lamer zorgt et smatlappekoor ‘Kommer en Geklach’ uut Spange veur een optreden waor de zael wis en zeker bi’j betrokken wodden zal.
Schriever Freddie de Vries van Hooltpae lest nao et schoft een peer van zien humoristische verhaelen veur. Veur veul meensken bin et verhaelen mit herkenbere situaosies, en de wieze waorop die deur de schriever naor veuren brocht wodden, maekt die verhaelen nog vermaekeliker.
De tenielklub van de dörpen komt ok al mit veul humor om de hoeke kieken. Leden d’r van speulen de hilarische ienakter ‘Boer, jow varken het mien hond beten’.
De Stellingwarver aovend wodt ofsleuten mit gezellige meziek. D’r is dan nog even alle tied om mit mekeer nao te genieten van de dadde Stellingwarver Dag.
De aovend wodt prissenteerd deur Klaas van Weperen, veurzitter van de Stellingwarver Schrieversronte, en Hendrik Fokkema, siktaoris van die stichting.
De toegang van alle aktiviteiten is ommenocht. De Stellingwarver Dag wodt veur iederiene in en buten Stellingwarf anbeuden deur de verienings van Plaetselik Belang van Ooldelaemer en van Ni’jlaemer, basisschoele De Lamer en de Stellingwarver Schrieversronte.