De Stellingwarver dichter Harmen Houtman het mit zien gedicht Speulse meitied de gedichtenwedstried ‘Lente’ van et Friesch Dagblad wunnen. D’r wodden in totaol 45 gedichten van 43 verschillende dichters inzunnen. Harmen Houtman zien licht erotische gedicht kwam as beste naor veuren. De jury bestund uut de cultuurredacteuren Bauke Boersma en Abe de Vries van et Friesch Dagblad. Zij vunnen veural de overgang in Speulse meitied van Botticelli in Florence naor de staldeuren in Ni’jtriene prachtig.
Ie kun zeggen dat et ‘oogsttied’ is veur schriever Harmen Houtman. An et aende van meert wun hi’j al de J. H. Bergveldpries. Hieronder et winnende gedicht:
Speulse meitied
…ik docht an d’oolde Botticelli,
die uut zien penselen de ‘La Primavera’
toverde, as kedo veur de slaopkaemer
van de Florentijnse Lorenzo di Medici
de Italiaanse meitied was nog nooit
zo indrokwekkend west, vrouwluden
in deurzichtige gewaoden zweven gewichtloos
over een bedde van veurjaorsbloemen,
Cupido mit zien blienddoek veur
is vliegende van doel raek te schieten;
pielk en boge kennen dudelike heur weg…
…ik docht an die greide in Ni’jtriene,
de staldeuren sleugen eupen,
Durkje Achte en heur kammeraodkes
steuven et grös mit peerdebloemen deur…
…de utters zweefden haost gewichtloos
boven de pollen mit koekoeksbloemen,
as kleine ukken die de weg kwiet weren…
In de ni’je meitied wi’jt speuls
een deuntien deur oeroolde lochten…
Harmen Houtman
foto: Lenus van der Broek