Historisch geograaf dr. Meindert Schroor uut Liwwadden wus zaoterdagmiddag 24 juni de toeheurders in ’t Anker in Else zien verhael over de historische verdedigingslinies in en rond de Stellingwarven en Noord-Nederland zo te vertellen dat ze stilzwiegend an zien lippen hongen. De lezing van Schroor was de vuufde in de lezingenreeks, die holen wodt in et kader van 350 jaar Herdenking Rampjaor Friese Waterlinie 1672-1673.
In 2008 prissenteerde Schroor zien eerste boek over de Friese Waterlinie. Disse middag, mit krapan een kleine veertig anwezigen, gaf Schroor daor een uutbreiding op, mit anvullende infermaosie en kontekst in tied en plak. De oorlogstaferelen rond de Friese Waeterlinie in Zuidoost-Fryslân zette hi’j mit een power-point-prissentaosie mooi henne. Daorbi’j veul kaortmateriaol uut tal van de noordelike archieven die hi’j veur zien lezingen en zie’n ni’jste boek opdeuk om een nog beter inzicht te geven hoe as doedestieds in de greensstreek van de Stellingwarven ien en aander gaon is.
In Schroors ni’jste boek Grensland Stellingwerf, een uutgaove van de Stellingwarver Schrieversronte, gaot Schroor daor dieper op in. Et boek het een hard kaft, telt 160 bladzieden en kost € 19,50. Ok is et boek te koop in de boekhaandels in de Stellingwarven mar ook te bestellen bi’j de Schrieversronte in Berkoop: www.stellingwarfs.nl of telefonisch 0516-451108.
foto: Lenus van der Broek
