Maondeliks of jaorliks in et zunnegien – dat gebeurt meensken niet gauw, zeker niet vanwegens wark in een bestuur doen of vertegenwoordiger wezen bi’j een aandere klub. Al gaot et om vule langer, d’r was kotleden alle reden om zoks wisse wel te doen wat Jan Haveman anbelangt. Die is al van de oprichtingsbi’jienkomst in 1972 of lid van de Stellingwarver Schrieversronte. Haveman kwam in Buil op ‘e wereld, hi’j woonde laeter in Steggerde en nao zien onderwiezersopleiding, zien lerersopleiding Nederlaans en verschillende betrekkings in et onderwies was hi’j et laeste stok van zien loopbaene rektor van een schoelegemienschop in Emmen. Hi’j vertegenwoordigde van 1999 of de Stellingwarver Schrieversronte in et bestuur van SONT (‘Streektaelorgenisaosies Nedersaksisch Taelgebied’, bestaonde uut vri’jwilligers) en hi’j dee daor aorig veul wark. Mar in de SONT-vergeerdering van 9 november 2018 nam hi’j ofscheid, om zien leeftied.
De Stellingwarver Schrieversronte hadde op 14 december 2018 een biezundere bi’jienkomst opzet mit bestuur, passeniel en vri’jwilligers. Ok Haveman zien vrouw Tineke was d’r bi’j. Klaas van Weperen, veurzitter van de Stellingwarver Schrieversronte, daankte Haveman naodrokkelik veur al zien inzet. Zien Stellingwarver taelorgenisaosie hadde him niet aanders kend as een butengewoon trouw, konstruktief en sekuur vertegenwoordiger van oonze regio in et bestuur van SONT, zee hi’j.