Geweldig veul lof en komplementen weren d’r donderdagaovend veur de maekers en speulders van de ni’je Stellingwarver film ‘Daor klept de klokke weer’. Veur de première d’r van was ommeraek veul belangstelling, dat Filmhuus Slieker in Liwwadden mos ok zien twiede filmzael beschikber stellen. De aovend wodde orgeniseerd deur et Europees Buro Kleine Taelen (EBLT) i.s.m. de Stellingwarver Schrieversronte op ’e ’Dag van de Memmetael’, 21 feberwaori.
Veul speulders en figuraanten van de film weren naor Liwwadden kommen om daor veur et eerst ’heur’ film te zien. De spanning was vanzels groot, op dit mement hadden ze allemaole even waachten moeten. De opnaemen wodden in de zommer van 2017 maekt, mar deur wat tegenslag nao die tied was de film laeter klaor as dat eerst et doel was.
Spanning was d’r vanzels ok bi’j skriptschriever en regisseur Thomas Rovers uut Grunningen. Ok al was hi’j tot op et laeste betrokken bi’j de laeste punties op de i, veur him was et uteraord slim spannend hoe op zien eerste grote film reageerd wodden zol. Spanning was d’r ok bi’j zien regie-assistent Marco Reeker, filmmeziekmaeker Dyno Hedges en Sietske Bloemhoff die indertied et initiatief veur de film nam en veur de perduktie zorgde. Al gauw was dudelik dat d’r niet alliend veul lof en wardering was veur alle akteurs in de film, mar ok dat die dr’niet minder was veur Rovers en zien filmploeg. In alle opzichten professioneel, dat was wat kenners d’r van zeden, en daor was ieder vanzels slim mit inneumen.
Arg veul wardering was d’r ok veur et filmlied ‘Lied van Stellingië’, dat an et aende van de film te heuren is. Heufdrollespeulder Emma Winter zingt et lied op indrokwekkende wieze; de tekst wodde schreven deur Henk Bloemhoff, de meziek is van Robert Lanting. Et doel is om et lied ok nog appat van de film uut te geven.
De première veur de Stellingwarver film ‘Daor klept de klokke weer’ was hielemaole uutverkocht.
Op 22 meert wodt de film veur et eerst in Stellingwarf vertoond, dat zal wezen in de theaterzael van ’t Buurthuus in Noordwoolde. Wie daor graeg naor toe wil, dat kan. D’r is een beparkt tal kaorten veurraodig; de intree is € 5,-. Risserveren kan deur een mail te sturen naor de Stellingwarver Schrieversronte: info@stellingwarfs.nl