Ni’jste boek van Johan Veenstra ‘Vroeger is veurgoed veurbi’j’: verschenen zommer 2018, jannewaori 2019 al in herdrok!
Ie zollen de hittegolf van de 30ste weke van 2018 al haost vergeten wezen, mar dat was toegelieke dat et ni’jste boek van de produktieve Stellingwarver schriever Johan Veenstra op ‘e wereld kwam. Dat was in et MFC ‘De Ni’je Stienze’ in Ni’jhoolpae, op ‘e aovend van 27 juli om percies te wezen. ‘Vroeger is veurgoed veurbi’j’, een pakkende titel die staot veur een dikke twiehonderd bladzieden – en dat veur mar € 14,50. En now bin we al weer in jannewaori 2019 en… gaot dat boek in herdrok! Zoveul liefhebberi’je is d’r! Nog hiel even geduld, en uutgever Stellingwarver Schrieversronte kan et je weer leveren! Dat kan via info@stellingwarfs.nl: € 14,50, SSR 181, ISBN 978-90-6466-194-5. En netuurlik weer via de bekende boekwinkels.
Et ni’je boek ‘Vroeger is veurgoed veurbi’j’ wodde in 2018 ankondigd as spannend en ontroerend – en bi’j de prissentaosie leut de schriever al op een indringende meniere wat marken waj’ al lezende ondergaon zullen. Alle wardering die laeter blieken dee, gelt netuurlik vandaege-de-dag liekegoed!
Bi’j de prissentaosie kreeg Sippy Tigchelaar et eerste exemplaor van de schriever anbeuden. Zi’j het bi’j Omroep Frieslaand warkt en kwam indertied bi’j Veenstra thuus om zien radioverhaelties op te nemen. En nog hebben ze een goed kontakt. Neerlandikus Peter Riksma was vraogd om Johan Veenstra an de haand van vraogen vertellen te laoten over et boek, en dat dee hi’j op een kundige meniere. Et sprak de zael bepaold an.
An now toe publiceerde Johan Veenstra 28 literaire boeken; dit 28ste ‘nommer’ in de riegel is zien zeuvende roman. Behalven om zien romans is Veenstra ok slim bekend vanwegens zien Stellingwarver poëzie, zien verhaelen en veurdrachten. En vanzels om zien kollums in et Stellingwarfs, benaemens in de LC (deensdagkraante). Veenstra warkt ok riegelmaotig mit an et Stellingwarver tiedschrift ‘De Ovend’