De 68ste jaordag van Stellingwarver schriever Harmen Houtman zal hi’j grif niet gauw vergeten! Datzelde gelt ok veur alle meensken die vri’jdagmiddag 22 feberwaori 2019 die jaordag mitvieren konnen. Want naodat iederiene mit mekeer veur de jaorige zongen hadde, verscheen in et MFC ‘De ni’je stienze’ van Ni’jhooltpae ok et ni’jste boek van Houtman ‘As ik kiezen moch”.
Et eerste exemplaor rikte de schriever uut an Ype Dijkstra uut Oosterwoolde. Dat gebeurde mit naeme omdat Houtman altied veul bewondering en respekt had hadde veur de wieze waorop Dijkstra negen jaor veurzitter was van de Stellingwarver Schrieversronte.
Ype Dijkstra gaf an dat hi’j slim wies was mit et boek, en gong vervolgens in op de verhaelen die in ‘As ik kiezen moch” opneumen binnen. Dat kon, omreden hi’j van teveuren deur de uutgeveri’je van de Schrieversronte in de gelegenhied steld was om et boek te lezen. ‘Et is veural een hiel ontroerend boek wodden,’ zo gaf Dijkstra o.e. an. ‘Jow hebben daor niet alliend op een hiele mooie en gevulige wieze in verteld over jow jaoren thuus bi’j jow oolden in Ni’jhooltpae, mar bi’jglieks ok over de biezundere reizen die jow tegere mit jow vrund maekten.’ De oold-veurzitter van de SSR gaf daorbi’j een peer veurbeelden van de verhaelen uut mit naeme et eerste pat van et boek. Harmen Houtman kwam netuurlik zels ok an et woord. Hi’j vertelde over hoe hi’j, naodat hi’j een periode aenlik alliend mar gedichten en liedteksten schreven hadde, de draod van et schrieven van verhaelen weer opnam in 2011. Veur et schoft las Houtman et verhael ‘De laeste jurk’ uut et ni’je boek veur. Veur et schoft trad ok Lammy Bruyns op en zong een tal lieties mit teksten van Houtman, heurzels begeleidende op de akkordeon. Speciaol veur de middag was et verhael ‘As ik kiezen moch” deur Houtman ok in dichtvorm schreven, en Lammy Bruyns brocht dit lied op een ingetogen en gevulige wieze.
Nao et schoft weren d’r twie biezundere bi’jdregen. Zo vertelde kollega-schriever Johan Veenstra een speciaol schreven verhael veur disse middag over veul gebeurtenissen die hi’j tegere mit Houtman mitmaekt hadde. En dat weren d’r hiel wat, want Veenstra en Houtman bin al meer as vuuftig jaor goeie kammeraoden. Nao et verhael van Johan Veenstra las Attie Nijboer een keuze uut de gedichten van Harmen Houtman veur. De dichteres uut Oosterwoolde vertelde ok dat ok zi’j veul wardering het veur et wark van Houtman, en dat was ok wel te marken an heur kundige wieze van veurdracht. Now en dan treden Nijboer en Houtman ok tegere op, zoas oflopen zommer in de Taeletuun in Liwwadden.
Nao et schoft zong zangeres en akkordeoniste Lammy Bruyns opni’j een tal van heur prachtige lieties mit teksten van Harmen Houtman.